اٹک، ڈسٹرکٹ پولیس آفیسر (ڈی پی او) اٹک ڈاکٹر غیاث گل نے کہا کہ پی ٹی آئی احتجاج میں برازیل ساختہ شیل مظاہرین کے پاس تھے اور وائرلیس کے ذریعے کمیونیکیشن کررہے تھے۔
ڈاکٹر غیاث گل نے اٹک میں پریس کانفرنس کے دوران یہ بتایا کہ اٹک میں ناکہ بندی پر مظاہرین نے فائرنگ کی، پولیس نے اپنی جان ہتھیلی پر رکھ کر انہیں گرفتار کیا۔
غیاث گل نے کہا کہ ہم نے اٹک میں مظاہرین کو روکنے کی کوشش کی، اس دوران مظاہرین سے جھڑپیں ہوئیں اور کئی افراد گرفتار کیے، جو مظاہرین وہاں سے بھاگ رہے تھے پولیس نے انہیں حراست میں لیا۔
ڈی پی او کا کہنا ہے کہ پولیس فورس ریاستی ادارہ ہے اور عوام کے جان و مال کا محافظ ہے، کوئی ایسا دن نہیں گزرتا جب کوئی پولیس والا شہادت پیش نہ کرے، پولیس کی یونیفارم غازیوں اور شہدا کی علامت ہے۔
ڈاکٹرغیاث گل نے کہا کہ تحریک انصاف کی احتجاج کی کال سے پورا ملک ہیجان کی کیفیت میں رہا، پولیس کی جانب سے 700 مظاہرین کو گرفتار کیا گیا، 1150 میں سے 89 ایسے لوگ ہیں جن کا پاکستان میں ریکارڈ ہی نہیں۔
گرفتار کیے گئے ایک شخص کے موبائل سے ویڈیو ملی، اس ویڈیو میں ایک شخص پولیس کی وردی پکڑے کھڑا ہے، ویڈیو میں ریاستی ادارے کی بے عزتی کی جارہی ہے، ویڈیو میں نظر آنے والے شخص کو گرفتار کیا جاچکا ہے۔
ہماری بد بختی ہے کہ آج ہم کس گراوٹ کا شکار ہیں، پتلون کیساتھ تصویر بناکر غازیوں اور شہدا کی تضحیک کی جارہی ہے، احتجاج کے دوران مظاہرین کی گاڑیوں میں موجود کین میں کیمیکل موجود تھا، زیر حراست مظاہرین عسکری ونگ کے کارندے ہیں۔
