نئی دہلی، بھارت میں مقامی ٹیموں کے میچ کے دوران ایک 35 سالہ کرکٹر دل کا دورہ پڑنے سے جان کی بازی ہار گیا۔
جمعرات کو بھارتی شہر پونے کے گروارے سٹیڈیم میں میچ کے دوران 35 سالہ کرکٹر عمران پٹیل دل کا دورہ پڑنے سے جان کی بازی ہار گیا۔
غیر ملکی میڈیا رپورٹ میں بتانا تھا کہ کھلاڑی اوپنر کے طور پر بیٹنگ کرنے آیا اور پچ پر کچھ وقت گزارنے کے بعد سینے اور بازو میں درد کی شکایت کرنے لگا۔
آن فیلڈ امپائرز کو معاملے سے آگاہ کیا اور انہیں میدان چھوڑنے کی اجازت دے دی گئی، تاہم پویلین واپس جاتے ہوئے عمران گرگئے۔
میچ کی لائیو سٹریمنگ کے دوران یہ سارا واقعہ کیمرے کی آنکھ نے محفوظ کرلیا، بیٹسمن عمران کے گرتے ہی میدان میں موجود دیگر کھلاڑی ان کی طرف آئے اور انہیں فوری طور پر ہسپتال منتقل کیا گیا جہاں ڈاکٹرز کی جانب سے اسے مردہ قرار دیدیا گیا۔
عمران پٹیل کے سوگواران میں بیوی اور 3 بیٹیاں ہیں جبکہ سب سے چھوٹی بیٹی کی عمر محض 4 مہینے ہے۔
واضح رہے کہ رواں سال ستمبر میں حبیب شیخ نامی کرکٹر بھی میچ کے دوران زندگی کی بازی ہار گیا تھا تاہم وہ ذیابیطس کا مریض تھا۔
