وزیر دفاع خواجہ آصف نے ایک بار پھر پی ٹی آئی کو تنقید کا نشانہ بناتے ہوئے کہا کہ جو آرمی چیف ان کی مرضی کا ہو، انہیں اقتدار میں رکھے وہ تحریک انصاف کا باپ ہوتا ہے۔
خواجہ آصف کی جانب سے سوشل میڈیا ویب سائٹ ایکس سابقہ ٹویئٹر پر بیان جاری کرتے ہوئے کہا گیا کہ تحریک انصاف والے ذاتی و سیاسی مفادات کیلئے وطن فروشی کر رہے ہیں۔
وزیر دفاع کا کہنا تھا کہ جب آرمی چیف پاکستان کی حفاظت کرے اس کے خلاف امریکا میں مظاہرہ کر رہے ہیں، جب مذاکرات کی بات ہوتی ہے تو مذاکرات صرف اسٹیبلشمنٹ سے! آرمی چیف کے آگے سجدہ ریز ہونے کو تیار ہو، پتہ نہیں کیا کیا کرنے کو تیار ہو جاؤ، جب بات نہ بنے تو پھر 9 مئی کرنے کی کوشش کریں اور امریکی کی غلامی بھی منظور ہی منظور۔
سینئر ن لیگی رہنما کا کہنا تھا کہ جو آرمی چیف ان کی مرضی کا ہو انہیں اقتدار میں رکھے وہ تحریک انصاف کا باپ ہوتا ہے۔
خواجہ آصف کا کہنا تھا کہ پاکستان کو دوہری شہریت ختم کر نی چاہیے، بیشتر ممالک نے یہ سہولت ختم کر دی ہے اور سمندر پار پاکستان کے مفادات کے خلاف کام کرنے والوں کو اس کی قیمت ادا کرنی چاہیے، یہ امریکا میں فلسطین کے حق میں آواز نہیں اٹھائیں گے، فلسطین کی نسل کشی پہ خاموش رہیں گے لیکن آئی ایم ایف کو پاکستان کے خلاف آمادہ کرنے کی کوششیں کریں گے۔
وزیر دفاع کا کہنا تھا کہ سیاست کرنا چاہتے ہیں تو پاکستان آئیں آٹے دال کا بھاؤ معلوم ہوجائے گا۔
