تحریک انصاف کے رہنما بھی پارٹی پالیسی سے مایوس۔
پی ٹی آئی رہنما شوکت یوسفزئی کہتے ہیں لیڈرشپ نے مایوس کیا، یہ تحقیقات ضروری ہونی چاہئیں کہ احتجاج کیلئے ڈی چوک کو ہی کیوں چنا گیا۔ نجی ٹی وی چینل سے گفتگو کرتے ہوئے ان کا کہنا تھا کہ وزیراعلیٰ خیبرپختونخوا اور بشریٰ بی بی محفوظ ہیں وہ دونوں اس وقت مانسہرہ میں ہیں۔
ان کا کہنا تھا کہ تحریک انصاف کی لیڈرشپ نے مایوس کیا، وزیراعلیٰ خیبرپختونخوا کے علاوہ کوئی لیڈرسامنے نہیں آیا۔
پی ٹی آئی کی لیڈرشپ میں مشاورت اور کوآرڈینیشن نظر نہیں آئی، جب لیڈرشپ کے پاس فیصلے کا اختیار نہیں تھا تو اتنے زیادہ کارکنوں کو کیوں احتجاج کیلئے نکالا گیا؟
جب وفاقی حکومت کی جانب سے مذاکرات کی آفر کی گئی تھی تو پھر مذاکرات کیوں نہیں کئے گئے؟
تمام پارٹی رہنماوں کو پہلے سے علم تھا کہ حکومت ڈی چوک میں فسطائیت کا مظاہرہ کرے گی۔
ان کا مزید کہنا تھا کہ بیرسٹر گوہر، سلمان اکرم راجہ احتجاج میں کیوں نظر نہیں آئے؟ شیر افضل مروت بھی مکمل طور پر غائب تھے۔
