32
کوئٹہ، وزیراعلیٰ بلوچستان میر سرفراز بگٹی کا کہنا ہے کہ صوبے میں دہشتگردوں کے خلاف ٹارگٹڈ آپریشن کرنے جارہے ہیں۔
کوئٹہ میں پریس کانفرنس کے دوران سرفراز بگٹی نے کہا کہ لوگوں کو قتل کرنے والوں کے خلاف آپریشن کے سوا کوئی آپشن نہیں، 10 سالہ مصور خان کے اغوا پر افسوس ہوا۔
سرفراز بگٹی کا کہنا تھا کہ آپریشن کی مخالفت کرنے والی سیاسی جماعتیں دہشتگردی کے خلاف حل بتائیں، کیونکہ کوئی بھی حکومت ہو وہ یہ نہیں چاہے گی کہ یہاں سے بچے اغوا ہوں، بچوں کو اغوا کرنے والوں کے خلاف کارروائی کی جائے گی۔
ایک سوال کے جواب میں وزیراعلیٰ بلوچستان نے کہا کہ جب تک موقع ہے بلوچستان کے عوام کی خدمت کروں گا، انہوں نے وزیراعلیٰ کی تبدیلی سے متعلق پوچھے گئے سوال کا جواب دینے سے گریز کیا اور کہا کہ اس پر کوئی تبصرہ نہیں کروں گا۔
یاد رہے کہ کچھ روز پہلے نیشنل ایکشن پلان کی ایپکس کمیٹی کی جانب سے بلوچستان میں دہشتگرد تنظیموں کے خلاف فوجی آپریشن کی منظوری دی گئی تھی۔
