لاہور، سینئر صوبائی وزیر مریم اورنگزیب کی جانب سے لاہور میں پی ٹی آئی کے احتجاج پر اپنے بیان میں کہا گیا کہ گھر کا معاملہ گھر میں ہی طے کر لیں اور پی ٹی آئی کا اثر و رسوخ اب ختم ہو چکا ہے۔
مریم اورنگزیب کا کہنا تھا کہ عوام نے تحریک انصاف کی سیاست کو مسترد کر دیا ہے اور اس کا سیاسی "فرنچائز” اب دیوالیہ ہو چکا ہے۔
سینئر صوبائی وزیر کا بشری بی بی اور علیمہ باجی کے غائب ہونے پر تنقید کرتے ہوئے کہا کہ یہ دونوں شخصیات تحریک انصاف کی قیادت سے فارغ ہو چکی ہیں۔
مریم اورنگزیب کا کہنا تھا کہ پی ٹی آئی کا قائد جس فتنہ اور فساد کا حصہ رہا، وہ اب جیل میں بند ہے اور اس کا انقلاب مکمل طور پر ناکام ہو چکا ہے۔
دوسری جانب وزیر خارجہ اسحاق ڈار کا کہنا ہے کہ تحریک انصاف انہی دنوں میں احتجاجی کال دیتی ہے جب غیر ملکی وفود نے پاکستان آنا ہوتا ہے ۔
نائب وزیراعظم اسحاق ڈار کا کہنا ہے کہ پی ٹی آئی بار بار کیوں ایسے وقت پر احتجاج کی کال دیتی ہے ،جب اہم بین الاقوامی شخصیات پاکستان آرہی ہوں؟
ایک بیان میں نائب وزیراعظم اسحاق ڈار نے سوال اٹھایا کہ یہ سیاسی احتجاج ہے یا ملک کی عزت اور وقار کے خلاف سوچی سمجھی سازش ہے۔
