34
واشنگٹن، نومنتخب امریکی صدر ڈونلڈ ٹرمپ کی جانب سے اسکاٹ بیسنٹ کو وزیر خزانہ نامزد کردیا گیا۔
غیر ملکی میڈیا کے مطابق ٹرمپ نے فنڈ مینیجر اور ارب پتی سرمایہ کار اسکاٹ بیسنٹ کو اپنی کابینہ میں وزیر خزانہ کے طور پر نامزد کیا ہے۔ ڈونلڈ ٹرمپ کی یہ نامزدگی اٹارنی جنرل کے لیے نامزد میٹ گیٹز کی دستبرداری کے بعد سامنے آئی ہے۔
غیر ملکی میڈیا کا کہنا ہے کہ 62 سالہ اسکاٹ بیسنٹ انویسٹمنٹ فرم کی اسکوائر کیپیٹل مینجمنٹ کے بانی ہیں اور ان کا شمار ارب پتی سرمایہ کاروں میں ہوتا ہے، جب کہ اسکاٹ کی نامزدگی سے توقع کی جارہی ہے کہ وہ اپنے معاشی ایجنڈے میں ٹیرف میں اضافہ کریں گے۔
اسکاٹ بیسنٹ کی نامزدگی پر ٹرمپ کا کہنا ہے کہ اسکاٹ کا شمار دنیا کے بڑے انٹرنیشنل سرمایہ کاروں، جیو پولیٹیکل اور معاشی اسٹریٹیجسٹ میں کیا جاتا ہے، وہ امریکا کو ایک نئے سنہرے دور میں لیجانے کے لیے میری رہنمائی کریں گے۔
