اسلام آباد، وفاقی وزیر داخلہ محسن نقوی کا کہنا ہے کہ کسی کو وفاقی دارالحکومت کا امن و امان خراب کرنے کی ہرگز اجازت نہیں دیں گے۔
وفاقی وزیرداخلہ محسن نقوی صبح کے وقت پولیس فورس کا حوصلہ بڑھانے پولیس لائنز پہنچ گئے، وزیرداخلہ کی جانب سے قیام امن کیلئے اسلام آباد پولیس کی بہادری کی تعریف کی گئی۔
پولیس فورس سے خطاب کے دوران وفاقی وزیر داخلہ محسن نقوی نے کہا کہ 24 نومبر کو بیلاروس کا وفد اور 25 نومبر کو بیلاروس کے صدر پاکستان کا دورہ کر رہے ہیں۔
اس کو مدنظر رکھتے ہوئے ہم نے اسلام آباد شہر کو ہر صورت محفوظ رکھنا ہے، پولیس نے اسلام آباد کو محفوظ رکھنے کیلئے ایک ٹیم کی طرح مل کر کام کرنا ہے اور اسے یقینی بنانا ہے۔
وفاقی وزیر داخلہ کا کہنا تھا کہ پولیس فورس کو ہدایت کی گئی کہ اسلام آباد کے امن و امان کو خراب کرنے والے ہر شخص کو گرفتار کرنا ہے، اس بار اسلام آباد میں قانون ہاتھ میں لینے والے کسی بھی شخص کو واپس نہیں جانے دینا۔
محسن نقوی نے کہا کہ ہمیں آپ اور آپ کی زندگیاں بہت عزیز ہیں، دوران ڈیوٹی آپ نے تمام حفاظتی سامان پہننا ہے اور پوری احتیاطی تدابیر اختیار کرنی ہیں۔
