عابد رضا کوٹلہ کا کہنا ہے کہ تختی مافیا گینگ نے قینچیاں پکڑ رکھی ہیں اور ضلع گجرات کو اکھاڑ پچھاڑ کر اپنا رانجھا راضی کر رہے ہیں۔
پاکستان مسلم لیگ (ن) کے مرکزی رہنما چوہدری عابد رضا کوٹلہ کا کہنا ہے کہ تحریک انصاف کے منحرف رکن اور جھوٹے حلف دینے والے الیاس چوہدری بھی 08 فروری سے فارم 47 مافیا کا حصہ تھا۔
ان کا کہنا تھا کہ اسے تکنیکی بنیادوں پر فارم 47 جاری کرنے کی منصوبہ بندی الیکشن سے پہلے کی گئی جس کا واضح ثبوت میرے آبائی علاقہ میں پریزائیڈنگ آفیسرز کا غائب ہونا تھا۔
مسلملیگ (ن) کے ڈویژنل صدر کا کہنا تھا کہ موصوف الیکشن کے بعد کئی ماہ بعد تک کمال اداکاری سے تحریک انصاف کی جاسوسی کرتے رہے، الیاس چوہدری کی جانب سے کوٹلہ جلسہ میں سابق وزیر اعلی پنجاب میاں حمزہ شہباز شریف کی جانب سے اعلان کردہ اور ہماری تجویز پر سالانہ ترقیاتی پروگرام میں شامل کئے جانے والے منصوبے کا افتتاح مضحکہ خیز ہے۔
انہوں نے کہا کہ لیکن تختی مافیا گینگ نے قینچیاں پکڑ رکھی ہیں اور ضلع گجرات کو اکھاڑ پچھاڑ کر اپنا رانجھا راضی کر رہے ہیں، تقریبا ایک سال قبل تحصیل کھاریاں میں ڈوگہ تا تھپلہ روڈ کا نام تبدیل کر چوہدری ظہور الہی روڈ کی تختی لگائی گئی جہاں سے ہر گزرنے والا آج بھی انھیں جھولیاں اٹھا کر بددعائیں دے رہا ہے۔
انہوں نے کہا کہ جےپور اور باولی لنک روڈز کے فنڈز بھی اسی تختی مافیا نے روک کر عوام پر ظلمِ عظیم کیا ہے لیکن انکی زندگیوں میں آنے والی یہ چار دن کی چاندنی جلد ختم ہو جائے گی اور ان کی منافقت کی وجہ سے ایک طویل سیاسی سیاہ اندھیری رات انکی منتظر ہے۔
