کراچی، سربراہ پاک فضائیہ کے ائیرچیف مارشل ظہیر احمد بابر سدھو کی جانب سے بین الاقوامی دفاعی نمائش آئیڈیاز کا دورہ کیا گیا۔
آئی ایس پی آر کا کہنا ہے کہ ایئرچیف کی جانب سے نیشنل ایرو اسپیس سائنس اینڈ ٹیکنالوجی پارک پویلین میں مختلف اسٹالز کا دورہ کیا گیا، جہاں ظہیر احمد بابر نے غیر ملکی مندوبین سے بھی بات چیت کی، جبکہ ائیر چیف کی جانب سے دفاعی صنعت کے فریم ورک کے قیام کی حوصلہ افزائی بھی کی گئی۔
ائیرچیف مارشل ظہیر احمد نے نیشنل انکیوبیشن سینٹر فار ایرو اسپیس ٹیکنالوجی کے ذریعے ابھرتے ٹیلنٹ کو پروان چڑھانے کی اہمیت پر روشنی ڈالی، اس دوران ظہیر احمد کی جانب سے مقامی صنعتوں کی صلاحیتوں کو بڑھانے کے مواقع تلاش کرنے کی اہمیت کو اجاگر کیا گیا۔
آئی ایس پی آر کا کہنا ہے کہ دفاعی صنعت فریم ورک کا مقصد ایرو اسپیس سیکٹر میں موجود خلا کی نشاندہی اور اسے پر کرنا ہے۔
ایئرچیف کی جانب سے ٹیکنالوجیکل روڈ میپ کو ہم آہنگ کرنے کے لیے قومی اور بین الاقوامی تعاون کو فروغ دینے پر زور دیتے ہوئے کہا گیا کہ اس بات کویقینی بنایا جائے کہ پاکستان ایرو اسپیس انوویشن میں سب سے آگے رہے۔
آئی ایس پی آر کا کہنا ہے کہ آئیڈیاز میں پاک فضائیہ کی جدید ترین ٹیکنالوجیز کی شرکت کامیابیوں کے عزم کو واضح کرتی ہے۔
