اسلام آباد، وزارت داخلہ کی جانب سے 24 نومبر کو پی ٹی آئی کی جانب سے احتجاج کے اعلان پر سخت ترین اقدامات کا فیصلہ کر لیا۔
اسلام آباد میں ڈپٹی کمشنر نے احتجاج کے پیش نظر 2 ماہ کے لیے دفعہ 144 نافذ کر دی اور وزارت داخلہ کی جانب سے متعلقہ سیکیورٹی اداروں کو تیاری کی ہدایت جاری کر دی گئی ہے۔
ذرائع وزارت داخلہ کے مطابق شرپسندی میں ملوث افراد کے خلاف قانونی کارروائی کرنے کا فیصلہ کیا گیا ہے، جبکہ اسلام آباد میں سرکاری اور اہم عمارتوں کی بھی سیکیورٹی کے لیے سخت حفاظتی اقدامات کرنے کا فیصلہ کر لیا گیا۔
وزارت داخلہ نے راولپنڈی اور اسلام آباد میں سیکیورٹی کے لیے بھاری نفری تعینات کرنے کا حکم جاری کر دیا، احتجاج میں شامل شرپسند افراد کے پاسپورٹ اور شناختی کارڈ منسوخ کرنے کا فیصلہ کیا گیا ہے۔
ذرائع وزارت داخلہ کا کہنا ہے کہ احتجاج میں شامل شرپسند افراد کی سم بلاک کرنے کا بھی فیصلہ زیر غور ہے اور دہشت گردی کے ممکنہ خطرات سے نمٹنے کے لیے مشکوک مقامات کی نگرانی شروع کر دی گئی۔
