سابق ٹیسٹ کرکٹر محمد نذیر جونیئر کی طبعیت ناساز ہونے پر ان کے بیٹے نعمان نذیر کی جانب سے پی سی بی اور اعلی حکام سے علاج کیلئے اپیل کردی گئی۔
سابق ٹیسٹ کرکٹر محمد نذیر جونیئر کے صاحبزادے نعمان نذیر کا کہنا ہے کہ ان کے والد کے سینے میں انفیکشن اور پیٹ میں پانی جمع ہوگیا ہے، وہ خود بھی ان کے علاج کی ہر ممکن کوشش کررہے ہیں پاکستان کرکٹ بورڈ (پی سی بی) اور حکومت بھی علاج کے لیے اقدامات کریں۔
نعمان نذیر کا کہنا تھا کہ پی سی بی نے پہلے بھی ان کے ساتھ بہت تعاون کیا لیکن اس وقت انہیں انتہائی نگہداشت کی ضرورت ہے اس لیے اب پاکستان کرکٹ بورڈ(پی سی بی) اور حکومت اس متعلق تعاون کرے تاکہ ان کا علاج اچھے طریقے سے ہو سکے، والد کو پہلے سے زیادہ دیکھ بھال کی ضرورت ہے۔
سابق آل راؤنڈر گزشتہ 3،4 سال سے اپناعلاج خود کروا رہا ہے، بیٹے کی جانب سے پاکستان کرکٹ بورڈ کے اعلیٰ حکام سے اپیل کی گئی ہے کہ وہ سابق ٹیسٹ کرکٹر کے علاج معالجے کے لئے فوری اقدامات کریں۔
واضح رہے کہ سابق ٹیسٹ کرکٹر نذیر جونیئر نے پاکستان کیلئے 14 ٹیسٹ اور 4 ون ڈے میچز کھیل رکھے ہیں اور نذیر جونیئر نے مجموعی طور پر 37 وکٹیں حاصل کر رکھی ہیں، نذیر جونیئر نے 5 ٹیسٹ میچز میں امپائرنگ کے فرائض بھی انجام دے رکھے ہیں۔
