لندن، سربراہ جے یو آئی (ف) مولانا فضل الرحمان کا کہنا ہے کہ کسی سیاستدان کو قید کرنے کے حق میں نہیں اورعمران خان کی رہائی کی کوششوں میں میراکوئی کردار نہیں ہے۔
لندن میں میڈیا سے گفتگو کے دوران سربراہ مولانا فضل الرحمان کی جانب سے خواجہ آصف کے ساتھ لندن میں پیش آئے واقعے کی مذمت کی گئی۔ مولانا فضل الرحمان کا کہنا ہے کہ برطانیہ کی ذمہ داری ہے خواجہ آصف کے معاملے میں قانون کے مطابق کارروائی کرے۔
ایک سوال کے جواب میں مولانا کا کہنا تھا کہ ہم امریکا کی سیاست میں مداخلت کرتے ہیں نہ انہیں اپنے ملک میں مداخلت کی اجازت دے سکتے ہیں، امریکا میں ری پبلکن کی حکومت ہو یا ڈیموکریٹس کی، دنیا کے لیے ان کی پالیسی ایک ہے۔
مولانا فضل الرحمان نے کہا کہ ہمیشہ آئین اور جمہوریت پر شب خون مارا گیا، جمہوریت کی کمزوری میں سیاستدانوں کا بڑا کردار ہے، سیاستدانوں نے اپنے مفادات کی خاطر ڈیموکریسی پر کمپرومائز کیا۔
مولانا فضل الرحمان کا کہنا تھا کہ کسی سیاستدان کو قید کرنے کے حق میں نہیں،عمران خان کی رہائی کی کوششوں میں میراکوئی کردارنہیں ہے۔
