بھارتی فلم انڈسٹری کے معروف اداکار اور سیاستدان متھن چکروردی کی انتخابی ریلی کے دوران جیب کٹ گئی۔
بھارتی فلم انڈسٹری کے معروف اداکار اور سیاستدان متھن چکرورتی کا پرس چوری ہونے کا واقعہ اس وقت پیش آیا جب وہ جھارکھنڈ میں بی جے پی کے امیدوار اپرنا سین گپتا کی انتخابی مہم کے سلسلے میں دھنباد ضلع کے نیرسا اسمبلی پہنچے۔ میڈیا رپورٹس کے مطابق، جب متھن عوامی اجتماع سے خطاب کے لئے وہاں پہنچے، تو کسی نے موقع کا فائدہ اٹھا کر ان کا پرس چوری کر لیا۔
سوشل میڈیا پر ایک ویڈیو وائرل ہو رہی ہے جس میں اسٹیج سے اعلان کیا جا رہا ہے کہ جس کسی نے بھی متھن کا پرس لیا ہے، وہ اسے واپس کر دے۔ اسٹیج پر موجود ایک شخص مائیک پر کہتا ہے، "آپ سے درخواست ہے کہ جس نے بھی متھن دا کا پرس لیا ہے، وہ اسے واپس کر دیں۔
” اس واقعے کے بعد، متھن نے مختصر تقریر کے بعد جلسے کو الوداع کہا اور واپس چلے گئے۔ بی جے پی کے مقامی رہنماؤں نے اس معاملے پر کارروائی کا ارادہ ظاہر کیا ہے، تاہم متھن چکرورتی کی جانب سے ابھی تک کوئی باضابطہ بیان سامنے نہیں آیا۔
پرس میں کیا موجود تھا، اس کی تفصیلات سامنے نہیں آئیں، لیکن یہ واقعہ مہم میں موجود لوگوں کے لیے حیرت کا باعث بن گیا۔
یہ واقعہ انتخابی مہم کے دوران سیکیورٹی کے حوالے سے بھی کئی سوالات کو جنم دیتا ہے، اور عوام میں بھی یہ موضوع خاصی دلچسپی کا باعث بن چکا ہے۔
