اسسٹنٹ کمشنر گجرات اور سیکرٹری ڈسٹرکٹ ریجنل ٹرانسپورٹ اتھارٹی نے دھواں چھوڑنے والی گاڑیوں کے خلاف کارروائی کرتے ہوئے متعدد گاڑیوں کو جرمانے کیے۔
گجرات، ڈپٹی کمشنر گجرات صفدر حسین ورک کی ہدایت پر اسسٹنٹ کمشنر گجرات بلال زبیر اور سیکرٹری ڈی آر ٹی اے صدام حسین نے سموگ کی روک تھام کے لیے مشترکہ کارروائیاں کیں۔ دورانِ انسپکشن، دھواں چھوڑنے والی گاڑیوں کو جرمانے کیے گئے اور کئی گاڑیوں کو موقع پر ہی بند کیا گیا۔ انسپکشن کے دوران مختلف شاہراہوں پر متعدد گاڑیوں کو چیک کیا گیا۔
ماحولیاتی آلودگی اور سموگ کے خطرات کو کم کرنے کے لیے حکومت پنجاب کی پالیسی کے تحت دھواں چھوڑنے والی گاڑیوں کے خلاف کارروائیاں تیز کر دی گئی ہیں۔
ڈپٹی کمشنر صفدر حسین ورک نے اس حوالے سے بتایا ہے کہ سموگ ایک سنگین ماحولیاتی مسئلہ ہے جس سے انسانی صحت پر مضر اثرات مرتب ہوتے ہیں۔ ضلع میں ہر ممکن اقدامات اٹھائے جا رہے ہیں تاکہ عوام کو سموگ سے بچایا جا سکے۔
اسسٹنٹ کمشنر گجرات اور سیکرٹری ڈی آر ٹی اے نے شہریوں کو بھی آگاہ کیا کہ وہ اپنی گاڑیوں کی حالت بہتر رکھیں اور دھواں چھوڑنے والی گاڑیوں کو سڑک پر نہ چلائیں، بصورت دیگر سخت قانونی کارروائی کی جائے گی۔
ڈپٹی کمشنر نے ہدایت کی کہ یہ مہم مستقل بنیادوں پر جاری رہے گی تاکہ ضلع کو سموگ سے پاک رکھا جا سکے اور صاف ستھرا ماحول فراہم کیا جا سکے۔
