41
وفاقی دارلحکومت اسلام آباد اور خیبر پختونخوا کے مختلف شہروں میں زلزلے کے جھٹکے محسوس کئے گئے ہیں۔
اسلام آباد اور خیبرپختونخوا کے مختلف شہروں میں آج صبح زلزلے کے شدید جھٹکے محسوس کیے گئے جن کی شدت ریکٹر اسکیل پر 5.3 ریکارڈ کی گئی۔ زلزلے کے یہ جھٹکے وفاقی دارالحکومت سمیت خیبرپختونخوا کے مختلف شہروں میں صبح 10 بج کر 13 منٹ پر محسوس کیے گئے، جس سے لوگوں میں خوف و ہراس پھیل گیا اور لوگ اپنے گھروں اور دفاتر سے باہر نکل آئے۔
زلزلہ پیما مرکز کے مطابق، زلزلے کا مرکز افغانستان کے کوہ ہندوکش ریجن میں تھا جبکہ اس کی گہرائی 220 کلومیٹر زیر زمین تھی۔
متاثرہ شہروں میں پشاور، ایبٹ آباد، سوات، شانگلہ، مردان، مالاکنڈ، بونیر، مہمند، شبقدر اور اٹک شامل ہیں۔ زلزلے کی شدت کے باوجود کسی جانی یا مالی نقصان کی اطلاع نہیں ملی، تاہم انتظامیہ نے عوام کو ہدایت کی ہے کہ وہ مزید آفٹر شاکس کے پیشِ نظر احتیاطی تدابیر اختیار کریں اور محفوظ مقامات پر رہیں۔
