کینیڈا نے سوشل میڈیا ایپ "ٹک ٹاک” کو اپنی سرزمین پر تمام بزنس آپریشنز بند کرنے کا حکم دے دیا ہے۔
کینیڈا نے سوشل میڈیا پلیٹ فارم ٹک ٹاک کو قومی سلامتی کے خدشات کی بنا پر ملک میں اپنا کاروبار بند کرنے کا حکم دے دیا ہے۔ کینیڈا کے وزیر سائنس و صنعت فرانسوا-فلپ شمپین نے کہا کہ بائیٹ ڈانس، جو ٹک ٹاک کی سرپرست کمپنی ہے، کے کاروباری آپریشنز سے قومی سلامتی کو خطرہ لاحق ہے۔ اس فیصلے میں کینیڈا کی سکیورٹی اور انٹیلی جنس اداروں کے مشورے شامل ہیں، اور یہ ایک جامع جائزے کے بعد لیا گیا ہے۔
کینیڈا نے پہلے ہی سرکاری ڈیوائسز پر ٹک ٹاک کے استعمال پر پابندی عائد کر رکھی تھی، اور اب اس نئے اقدام کے تحت کمپنی کو ملک میں اپنے بزنس آپریشنز ختم کرنے پر مجبور کیا جائے گا۔
تاہم، عام صارفین کے لیے ایپ کے استعمال پر پابندی کا اعلان نہیں کیا گیا۔ اس سے قبل امریکہ نے بھی قومی سلامتی کے خدشات کے پیش نظر ٹک ٹاک سے مطالبہ کیا تھا کہ وہ اپنا امریکی کاروبار کسی مقامی کمپنی کو فروخت کرے، ورنہ پابندی کا سامنا کرے گا۔
ٹک ٹاک کے ترجمان نے کینیڈا کے اس حکم کو عدالت میں چیلنج کرنے کا اعلان کیا ہے، ان کا کہنا ہے کہ کینیڈا میں دفاتر کی بندش اور سیکڑوں ملازمین کی ملازمتوں کا خاتمہ کسی کے مفاد میں نہیں۔ ترجمان نے مزید کہا کہ یہ فیصلہ غیر منصفانہ ہے اور کمپنی اس کے خلاف قانونی راستہ اپنائے گی۔
