کراچی، وفاقی وزیر خزانہ محمد اورنگزیب کا کہنا ہے کہ ہم درست سمت میں جارہے ہیں تاہم ابھی طویل سفر طے کرنا باقی ہے۔
کراچی میں فیوچر سمٹ سے خطاب کرتے ہوئے وفاقی وزیر خزانہ محمد اورنگزیب نے ملکی معیشت کے حوالے سے اپنے خیالات کا اظہار کیا۔ انہوں نے کہا کہ پاکستان کی معیشت صحیح سمت میں بڑھ رہی ہے اور ترسیلات زر میں اضافہ ہو رہا ہے جبکہ زرمبادلہ کے ذخائر بھی مستحکم ہیں، تاہم معاشی سفر ابھی طویل ہے اور بہتری کے لیے مزید اقدامات درکار ہیں۔ ان کا کہنا تھا کہ رواں مالی سال میں حکومت کریڈٹ ریٹنگ میں بی کی سطح پر پہنچنے کی کوشش کر رہی ہے، جس سے ملکی معیشت میں استحکام آئے گا۔
وزیر خزانہ نے مرغی اور دالوں کی قیمتوں میں اضافے پر بھی تشویش کا اظہار کرتے ہوئے کہا کہ حکومت اس بات کو یقینی بنائے گی کہ درمیانی سطح کے افراد عوام کو فائدہ پہنچانے میں رکاوٹ نہ بنیں۔ اس سلسلے میں اقتصادی رابطہ کمیٹی (ای سی سی) کے ہر اجلاس میں قیمتوں کا جائزہ لیا جائے گا اور پرائس کمیٹیز کے ساتھ کوآرڈینیشن بڑھائی جائے گی۔ انہوں نے مزید کہا کہ حکومت ڈیجیٹلائزیشن کے ذریعے انسانی مداخلت کو کم کرکے کرپشن پر قابو پائے گی اور صنعتوں کو مراعات اہداف کے تحت دی جائیں گی تاکہ معیشت ایک برآمدات پر مبنی نظام کی جانب گامزن ہو۔
متحدہ عرب امارات کے قونصل جنرل بخیت رومتی نے بھی فیوچر سمٹ میں شرکت کی اور پاکستانیوں کی کوششوں کو سراہتے ہوئے کہا کہ پاکستانیوں نے ہمیں مضبوط انفراسٹرکچر فراہم کیا ہے اور سرمایہ کاروں کا بھرپور خیال رکھنا چاہیے تاکہ دونوں ممالک کے تعلقات مزید مستحکم ہوں۔
