پشاور، خیبرپختونخوا میں اساتذہ کی انتہائی کم تنخواہوں کے معاملے پر پختونخوا اسمبلی میں توجہ دلاؤ نوٹس جمع کروا دیا گیا۔
توجہ دلاؤ نوٹس ممبر اسمبلی پیپلز پارٹی احمد کریم کنڈی کی جانب سے جمع کرایا گیا ہے۔ نوٹس کے مطابق ڈبل شفٹ سکول کے 8 ہزار اساتذہ 2022 سے انتہائی کم تنخواہ لے رہے ہیں، حکومت کی جانب سے کم سے کم ماہانہ اجرت 36 ہزار روپے مقرر کی گئی ہے۔
صوبے کے ڈبل شفٹ سکولوں میں 1 لاکھ 58 ہزار طلبہ تعلیم حاصل کرر ہے ہیں۔
احمد کریم کنڈی کی جانب سے جمع کروائے گئے نوٹس میں یہ کہا گیا ہے کہ دو نہیں ایک پاکستان کا نعرہ لگانے والی حکومت میں اساتذہ بنیادی حق سے محروم ہیں، حکومت اس متعلق کیا اقدامات کر رہی ہے ایوان کو آگاہ کیا جائے۔
دوسری جانب پاکستان پوسٹ میں گریڈ 1 تا 15 کی مزید سینکڑوں آسامیوں کو ختم کردیا گیا۔
اسلام آباد، وفاقی حکومت کی رائٹ سائزنگ پالیسی کے تحت پاکستان پوسٹ میں گریڈ 1 تا 15 کی مزید سینکڑوں آسامیوں کو ختم کردیا گیا۔ حکام کا کہنا ہے کہ وفاقی حکومت کی رائٹ سائزنگ پالیسی کے تحت پاکستان پوسٹ میں گریڈ 1 تا 15 کی مزید 1511 آسامیوں کو ختم کر دیا گیا ہے۔
