تاندلیانوالہ میں مسلح افراد نے حملہ کر کےگرفتار 3 سگے بھائیوں کو قتل کردیا۔
فیصل آباد کے تھانہ صدر تاندلیانوالہ میں مسلح افراد نے حملہ کر کےگرفتار 3 سگے بھائیوں کو قتل کردیا جبکہ1 ملزم زخمی ہوا۔
پولیس کا بتانا ہے کہ 6ملزمان تھانہ کی عقبی دیوار سے سیڑھیاں لگا کر داخل ہوئےتمام تھانیداروں کے کمروں کو باہر سے کنڈیاں لگائیں اور حوالات میں بند قیدیوں پر فائرنگ کردی۔
فائرنگ سے قتل ہونیوالوں میں بلال، عثمان اور ناصر شامل ہیں جبکہ زیر حراست آصف نامی ملزم زخمی ہوا،مقتول ملزمان2افراد کے قتل کیس میں زیر حراست تھے۔
پولیس کے مطابق فائرنگ مقتول ملزمان کے مخالفین کی جانب سے کی گئی، فائرنگ کے بعد ملزمان فرار ہوگئے۔
آئی جی پنجاب ڈاکٹر عثمان انور کی جانب سے واقعہ کا نوٹس لیکر آر پی او فیصل آباد سے رپورٹ طلب کرلی گئی، آئی جی پنجاب نے سی پی او فیصل آباد کو فائرنگ میں ملوث ملزمان کی فوری گرفتاری کا حکم دے دیا۔
ترجمان پنجاب پولیس کا بتانا ہے کہ ایس پی انویسٹیگیشن فیصل آباد اور سی آئی اے ٹیموں نے فائرنگ میں ملوث 6 مشتبہ افراد کو حراست میں لے لیا، قتل دیرینہ دشمنی کا شاخسانہ ہے ، مقتولین پر کھرل برادری کے افراد کے قتل کا الزام تھا۔
