اتر پردیش ، بھارتی شادیوں میں مضحکہ خیز واقعات کا رونما ہونا اب ایک عام بات سمجھی جاتی ہے، وہیں اب ایک اور شادی کی تقریب میں ہونے والے واقعے نے صارفین کو ہنسنے پر مجبور کر دیا۔
غیر ملکی رپورٹ کے مطابق بھارت میں ہونیوالی ایک شادی کی تقریب میں دلہن نے اپنے دلہا سے شراب کی بوتل اور چرس منگوالی، واقعہ اترپردیش کی بستی ضلع میں پیش آیا، جہاں شادی کی تقریب ایک دن میں ہی اختتام کو پہنچ گئی۔
دلہن نے مبینہ طور پر دولہے کو شادی کی رات ’چرس‘ لانے کو کہا، واقعہ روایتی رسم کے دوران پیش آیا تھا جو رخصتی کے بعد منائی جاتی ہے۔
لدھیانہ سے تعلق رکھنے والی دلہن کی جانب سے پہلے شوہر سے شراب کی بوتل خریدنے کی درخواست کی گئی جب وہ راضی ہوگیا اور جانے لگا تو دلہن نے کہا کہ چرس اور مٹن بھی لے آنا۔
اس مطالبے پر دولہا ناراض ہوگیا اور اس نے صاف انکار کر دیا جس پر بحث شروع ہوگئی، دونوں خاندانوں میں جھگڑا اس قدر بڑھ گیا کہ ثالثی کی کوششیں بھی ناکام رہیں اور دولہا علیحدگی کے فیصلے پر ڈٹا رہا، بعدازاں مقامی پولیس کو اطلاع دی گئی لیکن وہ بھی مسئلے کو حل کرنے میں ناکام رہی۔
دلہن کے اہلخانہ کی جانب سے وضاحت کی گئی کہ وہ مذاق کر رہی تھی اسے سنجیدگی سے نہیں لیا جانا چاہیے لیکن دولہے نے دلہن اور اس کے والدین کو گھر واپس بھیج دیا۔
